Përshkrimi i kompanisë

Kompleksi i Panaireve “Tirana Expo Centre” është ndërtuar sipas standardit gjerman të ndërtimit të godinave tregtare, me një sipërfaqe të mbuluar prej mbi 13,000 m2 si dhe mbi 15,000 m2 sipërfaqe ndihmëse si parking, magazinë të brendshme dhe të jashtme, etj., me potencialin dhe perspektiven që të zmadhohet deri në mbi 40.000 m2, duke e kthyer në një nga Komplekset më të mëdha të Panaireve dhe Ekspozitave Tregtare në Rajonin e Ballkanit dhe më gjerë. Shtrirja e kompleksit në sipërfaqe dhe ambientet e shumta, mundësojnë organizimin e një game të gjerë tematikash dhe organizimesh tregtare, kulturore dhe sportive të ndryshme, duke garantuar kushte optimale për organizatorët e eventeve, komoditetin maksimal për ekspozitorët dhe hapësirat e mjaftueshme për çdo vizitor për të shijuar një event/panair tregtar, kulturor dhe/ose sportiv. E ndodhur në një largësi prej rreth 33 km nga Porti i Durrësit, rreth 12 km nga Aeroporti Ndërkombëtar "Nënë Tereza" dhe 5 km nga Qendra e Tiranës, Kompleksi i Panaireve “Tirana Expo Centre” ka potencialin që të transformohet në një pikë të re ekonomike dhe sociale për qytetin e Tiranës dhe më gjerë. Shoqëri të huaja nga Bullgaria, Greqia, Italia, Gjermania, etj., kanë shfaqur hapur interesin e tyre për këtë nismë, duke e konsideruar si një domosdoshmëri të tregut shqiptar, për të bërë hapin cilësor në marrëdhëniet e biznesit, duke qenë se tashmë pritshmëritë e tyre për stabilitet dhe rritje ekonomike janë të përmbushura dhe të garantuara. Në politikën e zhvillimit të shoqërisë, këto janë vetëm hapat e para, pasi shërbimet e ofruara do të jenë edhe më të shumta (sikurse magazina doganore e përkohshme, infrastrukturë moderne e orientuar drejt mjedisit dhe “self-sustainable”) duke garantuar në këtë mënyrë për të gjithë aktorët e eventeve, komoditet maksimal por nga ana tjetër duke respektuar normat dhe standardet Europiane për Panairet dhe Eventet Tregtare duke mbrojtur mjedisin.