Përshkrimi i kompanisë

Studio B&L u krijua në vitin 2003 nga Ermal Bleta, Roland Lika dhe Doriana Bozgo. E përfshirë në projekte në shumë qytete të Shqipërisë, nga banesat një dhe shumëfamiljare tek tipologjitë më komplekse dhe masterplanet, krijimtaria e Studio B&L synon të përfaqësojë një qëndrim të spikatur analitik dhe kritik ndaj kontekstit në të gjitha rrafshet. Sfida frymëzuese e grupit është perceptimi i produktit arkitektonik si modelues i hapësirës, duke shmangur qasjen formale si qëllim në vetvete dhe pasqyruar referencat lokale gjeografike, klimaterike, kulturore, teknologjike e financiare. Duke besuar në misionin e arkitektit si gjenerues dhe përgjegjës i mjedisit të ndërtuar dhe i përgjigjes sociale ndaj tij, Studio B&L përpiqet të sygjerojë vlera të reja estetike dhe etike, që nuk vendosen dhunshëm, por me vetpërmbajtje ndërtojnë marrdhënie të qëndrueshme. Pjesëtarë të Studio B&L janë prej vitesh pjesë e mësimdhënies dhe kërkimit shkencor në Fakultetin e Arkitekturës dhe Urbanistikës – FAU pranë Universitetit Politeknik të Tiranës. Vitet e fundit, Studio B&L është ftuar nga disa zyra të huaja të bashkëpunojë në pjesëmarrje në konkurse ndërkombëtare, në bashkëpunime me Degli Esposti – Milano, Dogma – Bruksel, Latitude - Bruksel, Arriola&Fiol arquitectes - Barcelonë. Studio B&L në partneritet me Dogma kanë zhvilluar projektin e shpallur fitues të konkursit ndërkombëtar për hartimin e ndërhyrjeve strategjike për përmirësimin urban të korridorit Tiranë – Durrës (Durana) – lot2, si dhe kanë hartuar Planet e Përgjithshme Vendore të bashkive Durrës, Shijak, Vorë dhe Tropojë.