Përshkrimi i kompanisë

Shtëpia botuese IDEART e nisi veprimtarinë në vjeshtën e vitit 2002. Që në krye ajo nuk u konceptua si një editor për t’iu bashkuar radhës së botuesve të tregut shqiptar të librit; përkundrazi, larg çdo lloj prirjeje për t’u shpalosur si një aneks i ndonjë forme a natyre, që në hapat e para të veprimtarisë së vet botuese, IDEART ka mëtuar vazhdimisht t’u ofronte lexuesve shqiptarë diçkanë që mungonte: lidhjen dhe familjaritetin e fortë dhe të qenësishëm me Librin. Ky synim ka qenë dhe mbetet linfa e veprimtarisë botuese të IDEART, çka shfaqet qartësisht e mishëruar në moton: … Nuk botojmë thjesht libra, krijojmë biblioteka Duke ndjekur me besnikëri dhe përkushtim moton, përmes veprimtarisë së vet botuese, IDEART arriti të bëhet shumë shpejt faktor në fushën e përfaqësimit të librit shqiptar dhe atij të përkthyer në shqip, librit shkollorë e së fundmi me risi si: librin dhuratë, librin e kuzhinës dhe metodat interaktive për mësimin e gjuhës shqipe dhe anglishtes fillestare për fëmijë. Falë përkushtimit të stafit, përzgjedhjes së autorëve dhe veprave, përkthyesve, grupit redaktorial dhe paraqitjes së lartë grafike, IDEART ka arritur të krijojë profilin e vet si botues i prirë drejt vendosjes së një sistemi vlerash, të rregullave të paanshme të editorisë, respektimin e të drejtave autoriale, orientimit nga bashkëkohësia letrare dhe hapje për bashkëpunim efikas.