Përshkrimi i kompanisë

Agjencia Kombëtare e Planifikimir të Territorit (AKPT) është institucion publik buxhetor, me përgjegjësi planifikimi, në varësi të Ministrisë së Zhvillimit Urban, dhe e shtrin veprimtarinë e saj në të gjithë territorin e Republikës së Shqipërisë. AKPT, në bazë të Ligjit 107/2014, "Për planifikimin dhe zhvillimin e territorit", të ndryshuar, ka përgjegjësi të natyrës bashkërenduese. Ajo bashkërendon proceset e hartimit të dokumenteve të planifikimit të territorit dhe mbështet bashkërendimin horizontal e vertikal ndërmjet autoriteteve të planifikimit të territorit. AKPT udhëheq, koordinon dhe ndërlidh veprimtaritë për modernizimin e sistemit të planifikimit dhe promovimin e praktikave inovatore në arkitekturë e planifikim. AKPT është përgjegjëse për procesin e përmirësimit të legjislacionit të planifikimit. Është përgjegjëse për administrimin dhe mirëmbajtjen e bazës së integruar të të dhënave të planifikimit dhe zhvillimit të territorit. Është përgjegjëse për informimin e publikut për proceset e planifikimit të territorit, si edhe për nxitjen e pjesëmarrjes së tij gjatë proceseve të hartimit e të zbatimit të dokumenteve të planifikimit. AKPT kryen veprimtari kërkimore analiza dhe studime në funksion të propozimit, mbështetjes apo informimit të proceseve vendimmarrese dhe të përmirësimit të politikave në fushën e planifikimit të territorit. AKPT është përgjegjëse për zhvillimin e trajinimeve për profesionistët e sektorit publik dhe privat që ushtrojnë veprimtari profeionale në fushën e planifikimit të territorit. Gjithashtu, me qëllim ofrimin e mundësive dhe aftësimin praktik për studentët dhe profesionistët e rinj të fushave që lidhen me planifikimin e territorit, mbështet çdo vit organizimin e programeve të praktikave të punës.