Kur jemi në kërkim të një pune të re, shpesh përqendrohemi vetëm te pyetjet që do të na bëjë punëdhënësi. Por një intervistë nuk është vetëm për t'ju vlerësuar ju , është edhe mundësia juaj për të vlerësuar kompaninë.

Ka disa sinjale paralajmëruese ("red flags") që mund të tregojnë se vendi i punës nuk është aq i mirë sa duket. Ja cilat janë ato që nuk duhen injoruar.

1. Përshkrimi i punës ndryshon gjatë intervistës

Nëse pozicioni që ju prezantohet nuk përputhet me njoftimin për të cilin aplikuat, kërkoni sqarime. Ndryshimet e mëdha mund të tregojnë mungesë organizimi ose transparence.

2. Nuk flitet qartë për pagën dhe përfitimet

Nëse intervistuesi shmang vazhdimisht pyetjet për pagën, kontratën apo përfitimet, është mirë të tregoheni të kujdesshëm. Një kompani serioze është transparente për këto çështje.

3. Premtime të paqarta

 Shprehje si:

-"Do rritesh shumë shpejt."
-"Më vonë do flasim për pagën."
-"Do të shpërblehesh sipas performancës."

...pa asnjë detaj konkret, mund të jenë premtime që nuk realizohen.

4. Atmosferë negative gjatë intervistës

Nëse intervistuesit flasin keq për ish-punonjësit, ankohen vazhdimisht ose krijojnë një ambient jo profesional, kjo mund të jetë tregues i kulturës së kompanisë.

5. Nuk respektohet koha juaj

Vonesa të gjata pa njoftim, anulime të shpeshta ose mungesë komunikimi gjatë procesit të rekrutimit mund të tregojnë se kompania nuk i vlerëson kandidatët.

6. Pritshmëri të paarsyeshme

Nëse kërkohet të kryeni detyra jashtë orarit rregullisht, të jeni gjithmonë të disponueshëm ose të mbuloni disa role pa sqarime, mendohuni mirë përpara se të pranoni ofertën.

7. Nuk ka mundësi të bëni pyetje

Një intervistë duhet të jetë një bisedë në të dyja drejtimet. Nëse nuk ju jepet mundësia të pyesni për ekipin, kulturën, objektivat apo zhvillimin profesional, mund të jetë një sinjal negativ.

8. Presion për të vendosur menjëherë

 Nëse ju kërkohet të pranoni ofertën menjëherë, pa kohë për ta menduar ose për të lexuar kontratën, tregohuni të kujdesshëm. Vendimet e rëndësishme nuk duhet të merren nën presion.

 Si të reagoni?

 Mos kini frikë të bëni pyetje si:

-Si matet performanca në këtë rol?
-Si është kultura e ekipit?
-Pse është vakant ky pozicion?
-Cilat janë sfidat më të mëdha të këtij roli?
-Si duket suksesi pas 6 muajsh?

 Përgjigjet do t'ju ndihmojnë të kuptoni nëse kompania është vërtet vendi i duhur për ju.

Jo çdo ofertë pune është mundësia e duhur. Ashtu si kompania vlerëson aftësitë tuaja, edhe ju duhet të vlerësoni nëse ajo ofron një ambient të shëndetshëm, transparent dhe profesional. Të dalloni "red flags" që në intervistë mund t'ju kursejë shumë zhgënjime në të ardhmen.

"Intervista më e mirë nuk është ajo ku merrni menjëherë një ofertë, por ajo ku kuptoni se po bëni zgjedhjen e duhur për karrierën tuaj."